22 nýggjar íbúðir á Heimasta Horn í Tórshavn

Bústaðir og Tryggingarfelagið LÍV hava stovnað P/F Heimasta Horn II, sum skal eiga og reka leigubústaðirnar á Heimasta Horni II í Tórshavn. Tær 22 nýggju íbúðirnar verða klárar at útleiga í næstum. Albert Isfeld arkitektar AF hava teknað og P/F MT Højgaard Føroyar hava bygt.  

Íbúðirnar

Byggingin er plaserað í røðum, eins og raðhús, í náttúruvækra Havnadali beint omanfyri krossin Landavegur / Kirkjubøarvegur. Lendið hevur væl av halli suðureftir oman móti Kirkjubøarvegnum, og allar íbúðirnar hava útsýni yvir Kirkjubøreyn, Havnardal, Nólsoyarfjørð og Nólsoynna alt eftir staðseting.

Íbúðirnar eru 83 m2 til støddar og eru innrættaðar við køki og stovu í einum, tveimum sovikømrum, baðirúmi og duri. Hjallur og goymslurúm eru til allar íbúðirnar beint í túninum. 

Omanfyri 500 íbúðir

Tað gongur væl við byggingini hjá Bústøðum - Føroya bústaðafelag. Aðal uppgávan er at finna nýggjar og tíðarhóskandi hættir at byggja bústaðir. Byggjast skal eitt hóskandi tal av leigubústøðum kring alt landið við fyriliti fyri byggikostnað, orkunýtlsu og bústaðatørv. Í 2024 umsita Bústaðir omanfyri 500 íbúðir, og tað er vónandi við til at gera bústaðamarknaðin fjøltáttari og smidligari.